മലപ്പുറം: സിപിഐഎമ്മിന്റെ പ്രതിഷേധങ്ങള്ക്ക് മറുപടിയായി നിലമ്പൂരിലെ പൊതുയോഗം ശക്തിപ്രകടനമാക്കാന് പി വി അന്വര് എംഎല്എ. നിലമ്പൂരിലെ ചന്തക്കുന്ന് ബസ് സ്റ്റാന്ഡ് പരിസരത്ത് വൈകിട്ട് 6.30 നാണ് പരിപാടി നിശ്ചയിച്ചിരിക്കുന്നത്. പൊതുയോഗത്തില് വെച്ച് ജില്ലാ സെക്രട്ടറി ഇ എന് മോഹന്ദാസിനെതിരെ ഉള്പ്പെടെ തെളിവുകള് പുറത്തുവിടുമെന്നാണ് അന്വറിന്റെ അവകാശവാദം. മാമി തിരോധാനത്തില് കോഴിക്കോട് പൊതുയോഗം നടത്തുമെന്നും അന്വര് പ്രഖ്യാപിച്ചിട്ടുണ്ട്. സംഘര്ഷ സാധ്യത കണക്കിലെടുത്ത് നിലമ്പൂരില് പൊലീസ് സുരക്ഷ വര്ധിപ്പിച്ചു.
പി വി അന്വറിനെതിരെ സിപിഐഎം പ്രവര്ത്തകര് രംഗത്തുവരണമെന്ന സിപിഐഎം സംസ്ഥാന സെക്രട്ടറിയുടെ ആഹ്വാനത്തിന് പിന്നാലെ വലിയ പ്രതിഷേധ പരിപാടികളാണ് മലപ്പുറത്തും കോഴിക്കോടും അരങ്ങേറിയത്.
