കല്പറ്റ: മുണ്ടക്കൈ ചൂരല്മല ദുരന്തബാധിതര്ക്ക് ഭക്ഷണത്തിനായി നല്കിയത് പുഴുവരിച്ച അരിയെന്ന് പരാതി. മേപ്പാടി പഞ്ചായത്തില് നിന്ന് വിതരണം ചെയ്ത ഭക്ഷ്യക്കിറ്റിലാണ് ഭക്ഷ്യയോഗ്യമല്ലാത്ത പുഴുവരിച്ച അരി ലഭിച്ചത്.
അരി, റവ ഉള്പ്പെടെയുള്ള സാധനങ്ങള് ഉപയോഗിക്കാനാവില്ലെന്ന് ഗുണഭോക്താക്കള് പറയുന്നു. മൃഗങ്ങള്ക്ക് പോലും നല്കാന് കഴിയാത്ത ഭക്ഷ്യവസ്തുക്കളാണ് നല്കിയിരിക്കുന്നതെന്നും വസ്ത്രങ്ങള് ഉപയോഗിച്ചവയാണെന്നും ദുരന്ത ബാധിതര് ആരോപിച്ചു. സന്നദ്ധ സംഘടനകളും റവന്യൂ വകുപ്പും നല്കിയ ഭക്ഷ്യ കിറ്റുകളാണ് ദുരന്ത ബാധിതര്ക്ക് നല്കിയത് എന്നാണ് മേപ്പാടി പഞ്ചായത്ത് അധികൃതരുടെ വിശദീകരണം.
സംഭവത്തില് പ്രസിഡന്റിന്റെ ഓഫിസിലേക്ക് ഡി.വൈ.എഫ്.ഐ പ്രവര്ത്തകരും ദുരന്തബാധിതരും അതിക്രമിച്ചു കയറിയത് സംഘര്ഷത്തിനിടയാക്കി. ഭക്ഷ്യവസ്തുക്കളുമായി ഡി.വൈ.എഫ്.ഐ പ്രവര്ത്തകര് ഓഫിസില് കുത്തിയിരുന്ന് പ്രതിഷേധിക്കുകയാണ്.
