ബാഗളൂരു: കര്‍ണാടക സര്‍ക്കാരിനെ പുറത്താക്കാന്‍ കോണ്‍ഗ്രസ് എം.എല്‍.എമാര്‍ക്ക് ബി.ജെ.പി പണം വാഗ്ദാനം ചെയ്തുവെന്ന് കര്‍ണാടക മുഖ്യമന്ത്രി സിദ്ധരാമയ്യ. 50 കോണ്‍ഗ്രസ് എം.എല്‍.എമാര്‍ക്ക് 50 കോടി രൂപ വാഗ്ദാനം ചെയ്തുവെന്നാണ് സിദ്ധരാമയ്യ പറയുന്നത്. മൈസൂരു ജില്ലയിലെ ടി.നരസിപുര നിയമസഭാ മണ്ഡലത്തില്‍ നടന്ന ഉദ്ഘാടന ചടങ്ങില്‍ സംസാരിക്കവേയാണ് സിദ്ധരാമയ്യയുടെ പരാമര്‍ശം.
വാഗ്ദാനത്തോട് കോണ്‍ഗ്രസ് എം.എല്‍.എമാര്‍ യോജിച്ചില്ലെന്നും അതിനാലാണ് ബി.ജെ.പി തനിക്കെതിരെ തിരിഞ്ഞതെന്നും കള്ളക്കേസെടുക്കുന്നതെന്നും സിദ്ധരാമയ്യ കൂട്ടിച്ചേര്‍ത്തു.
‘സിദ്ധരാമയ്യ സര്‍ക്കാരിനെ എങ്ങനെയെങ്കിലും അട്ടിമറിക്കാന്‍, ബി.ജെ.പി 50 എം.എല്‍.എമാര്‍ക്ക് 50 കോടി വാഗ്ദാനം ചെയ്തു. എവിടെ നിന്ന് അവര്‍ക്ക് ഇത്രയും പണം ലഭിച്ചു? മുന്‍ മുഖ്യമന്ത്രിമാരായ ബി.എസ്. യെദ്യൂരപ്പ, ബസവരാജ് ബൊമ്മൈ, പ്രതിപക്ഷ നേതാവ് ആര്‍. അശോക, ബി.ജെ.പി സംസ്ഥാന അധ്യക്ഷന്‍ ബി.വൈ. വിജയേന്ദ്ര എന്നിവര്‍ പണം അച്ചടിക്കുന്നുണ്ടോ?’ സിദ്ധരാമയ്യ ചോദിച്ചു.
