കൊച്ചി: ഹേമ കമ്മിറ്റി റിപ്പോര്ട്ടില്ല പ്രതികരണവുമായി നടന് പൃഥ്വിരാജ്. ഹേമ കമ്മിറ്റി റിപ്പോര്ട്ടില് കുറ്റാരോപിതരായ എല്ലാവര്ക്കുമെതിരേ അന്വേഷണം നടത്തണമെന്നും കുറ്റക്കാരാണെന്ന് വ്യക്തമായാല് ശിക്ഷാനടപടി ഉണ്ടാകണമെന്നും പൃഥ്വിരാജ് പറഞ്ഞു. ‘അമ്മ’ സംഘടനയ്ക്ക് പരാതികള് പരിഹരിക്കുന്നതില് വീഴ്ച സംഭവിച്ചിട്ടുണ്ടെന്നും തിരുത്തല് നടപടികള് ആവശ്യമാണെന്നും അദ്ദേഹം പറഞ്ഞു.
ഹേമ കമ്മിറ്റി റിപ്പോര്ട്ടിലെ ആരോപണ വിധേയരുടെ പേരുകള് പുറത്തുവിടുന്നതില് തീരുമാനം എടുക്കേണ്ടത് സര്ക്കാരാണ്. പേരുകള് പുറത്തുവിടുന്നതിന് നിയമ തടസ്സമില്ലെന്നും പ്രിഥിരാജ് പറഞ്ഞു. ഉത്തരവാദിത്തമുള്ള സ്ഥാനത്തിരിക്കുന്നവര്ക്ക് നേരെ ആരോപണം ഉയര്ന്നാല് രാജിവെച്ച് അന്വേഷണം നേരിടുന്നത് തന്നെയാണ് നല്ലതെന്നും പ്രിഥിരാജ് പറഞ്ഞു.
ഹേമ കമ്മിറ്റിയുമായി ആദ്യം സംസാരിച്ചവരില് ഒരാള് ഞാന് ആണ്. ഈ റിപ്പോര്ട്ട് സമര്പ്പിക്കപ്പെടുന്നത് സിനിമാ മേഖലയില് സ്ത്രീകള് നേരിടുന്ന പ്രശ്നങ്ങളെക്കുറിച്ച് സമഗ്രമായ പഠനം നടത്തുവാനും എങ്ങനെയൊരു സുരക്ഷിതമായ തൊഴിലിടം സാധ്യമാകും എന്നതിനെക്കുറിച്ച് ചിന്തിക്കാനുമാണ്. ഈ റിപ്പോര്ട്ട് പ്രസിദ്ധീകരിച്ചതില് ഒരു ഞെട്ടലുമില്ല. കുറ്റകൃത്യം ചെയ്ത ആള്ക്കാരെ കണ്ടെത്തിയിട്ടുണ്ടെങ്കില് തുടര്നടപടികള് എന്താണെന്നറിയാന് നിങ്ങളെപ്പോലെ എനിക്കും ആകാംക്ഷയുണ്ട്.പൃഥ്വിരാജ് വ്യക്തമാക്കി.
