കൊച്ചി: ആശുപത്രിയിലെ ഐ.സി.യുവില് നിന്ന് പ്രതീക്ഷയായി ഉമ തോമസിന്റെ കുറിപ്പ്. എംഎല്എ സ്വന്തം കൈപ്പടയിലെഴുതിയ കുറിപ്പാണ് പുറത്തുവന്നത്. ഉമാ തോമസിന്റെ ആരോഗ്യസ്ഥിതി സംബന്ധിച്ച വിവരങ്ങള് പുറത്തുവരുന്നതിനിടെയാണ് ആശ്വാസമായി ഉമാ തോമസ് എംഎല്എ സ്വന്തം കൈപ്പടയില് എഴുതിയ കുറിപ്പ് പുറത്തുവന്നത്. ‘വാരിക്കൂട്ടണം എല്ലാ സാധനങ്ങളും’ എന്നാണ് കത്തില് എഴുതിയിരിക്കുന്നത്.
വാടകവീട്ടില് നിന്ന് എല്ലാ സാധനങ്ങളും എടുക്കാന് ശ്രദ്ധിക്കണമെന്ന് സൂചിപ്പിക്കുന്നതാണ് കുറിപ്പ്. പാലാരിവട്ടം പൈപ്പ് ലൈന് ജങ്ഷനിലെ വീട്ടില് അറ്റകുറ്റപ്പണി നടക്കുന്നതിനാല് മറ്റൊരു വാടക വീട്ടിലാണ് ഉമ തോമസും കുടുംബവും താമസിക്കുന്നത്.
സ്വന്തം വീട്ടിലേക്കു മാറുമ്പോള് ചെയ്യേണ്ട കാര്യങ്ങളെക്കുറിച്ചുള്ളതാണ് കുറിപ്പ്. വാടകവീട്ടിലെ എല്ലാ സാധനങ്ങളും എടുക്കാന് ശ്രദ്ധിക്കണമെന്ന് മലയാളത്തിലും ഇംഗ്ലീഷിലുമായി എഴുതിയിട്ടുണ്ട്.
കലൂര് സ്റ്റേഡിയത്തില് നടന്ന പരിപാടിക്കിടെ വീണുപരിക്കേറ്റ് സ്വകാര്യ ആശുപത്രിയില് ചികിത്സയില് കഴിയുകയാണ് ഉമാ തോമസ് എംഎല്എ.തീവ്ര പരിചരണ വിഭാഗത്തില് തുടരുകയാണെങ്കിലും ആരോഗ്യസ്ഥിതിയെക്കുറിച്ച് ആശങ്കപ്പെടേണ്ട സാഹചര്യമില്ലെന്നാണ് ഡോക്ടര്മാര് അറിയിച്ചത്.
