തിരുവനന്തപുരം: സംസ്ഥാന സ്കൂള് കലോത്സവവുമായി ബന്ധപ്പെട്ട് റിപ്പോര്ട്ടര് ടി.വി സംപ്രേക്ഷണം ചെയ്ത വീഡിയോയില് കേസെടുത്ത് ബാലാവകാശ കമ്മീഷന്.
മത്സരത്തില് പങ്കെടുത്ത ഒപ്പന സംഘത്തിലെ മണവാട്ടിയോട് പ്രണയം തോന്നുന്ന റിപ്പോര്ട്ടര് എന്നതായിരുന്നു സ്റ്റോറിയുടെ ഉള്ളടക്കം.മണവാട്ടിയായി മത്സരിച്ച വിദ്യാര്ത്ഥിനിയോട് റിപ്പോട്ടര് പ്രണയത്തോടെ സംസാരിക്കുന്നതും നോക്കുന്നതുമായ ദൃശ്യങ്ങളാണ് വീഡിയോയിലുള്ളത്.
തുടര്ന്ന് അവതാരകന് അരുണ് കുമാര് ഉള്പ്പെടെ, വീഡിയോയില് അഭിനയിച്ച റിപ്പോര്ട്ടറോടും മറ്റു സഹപ്രവര്ത്തകരോടും വിദ്യാര്ത്ഥിയെ കുറിച്ച് ചോദിക്കുകയും പരസ്പരം കളിയാക്കുകയും ചെയ്യുന്ന ചര്ച്ചകളും റിപ്പോര്ട്ടര് ടി.വി സംപ്രേക്ഷണം ചെയ്തിരുന്നു.
ഇതിനെ തുടര്ന്നാണ് ചാനലിനെതിരെ രൂക്ഷമായ വിമര്ശനം ഉയരുന്നത്. ചാനല് മേധാവിയില്നിന്നും തിരുവനന്തപുരം ജില്ലാ പൊലീസ് മേധാവിയില് നിന്നും കമീഷന് അടിയന്തര റിപ്പോര്ട്ടു തേടി. വിഡിയോ സാമൂഹമാധ്യമങ്ങളില് പ്രചരിച്ചതോടെയാണ് ബാലാവകാശ കമീഷന് കേസെടുത്തത്.
