തിരുവനന്തപുരം: മുഖ്യമന്ത്രിയുടെ എസ്കോര്ട്ട് വന്ന അഞ്ച് വാഹനങ്ങള് കൂട്ടിയിടിച്ച് അപകടം.എസ്കോര്ട്ടായി വന്ന ആംബുലന്സ് ഉള്പ്പെടെയുള്ള അഞ്ച് വാഹനങ്ങളാണ് കൂട്ടിയിടിച്ചത്. തിങ്കളാഴ്ച വൈകീട്ട് വാമനപുരം പാര്ക്ക് ജങ്ഷനിലായിരുന്നു സംഭവം. അപകടത്തില് ആര്ക്കും പരിക്കില്ല.
വാഹനവ്യൂഹത്തിലുണ്ടായിരുന്ന ഒരു വാഹനം സ്കൂട്ടര് യാത്രക്കാരിയെ ഇടിക്കാതിരിക്കാന് പെട്ടെന്ന് ബ്രേക്കിട്ടതോടെയാണ് പിന്നാലെയെത്തിയ മറ്റുവാഹനങ്ങള് കൂട്ടിയിടിച്ചത്.
സ്കൂട്ടര് യാത്രക്കാരി എം.സി. റോഡില്നിന്ന് ആറ്റിങ്ങല് ഭാഗത്തേക്ക് പോകാനായി തിരിയുകയായിരുന്നു. ഈ സമയം മുഖ്യമന്ത്രിയുടെ പൈലറ്റ് വാഹനം സ്കൂട്ടറില് ഇടിക്കാതിരിക്കാന് പെട്ടെന്ന് ബ്രേക്കിട്ടതാണ് അപകടകാരണം.
മുഖ്യമന്ത്രിയുടെ വാഹനത്തിന്റെ പിറകിലും സുരക്ഷാവാഹനം ഇടിച്ചെങ്കിലും കാര്യമായ അപകടമുണ്ടായില്ല.
