ഡല്‍ഹി: ദേശീയ മനുഷ്യാവകാശ കമ്മീഷനിലെ നിയമനത്തില്‍ വിയോജിപ്പ് രേഖപ്പെടുത്തി കോണ്‍ഗ്രസ്. തങ്ങള്‍ നല്‍കിയ നിര്‍ദേശങ്ങള്‍ പരിഗണിക്കുക പോലും ചെയ്യാതെ ഏകപക്ഷീയമായാണ് നിയമനം നടത്തിയതെന്ന് കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയും രാഹുല്‍ ഗാന്ധിയും ആരോപിച്ചു. നിയമനനടപടി ക്രമത്തിലെ നിഷ്പക്ഷതയിലും സത്യസന്ധതയിലും നേതാക്കള്‍ സംശയം രേഖപ്പെടുത്തുകയും ചെയ്തു.
എന്‍.എച്ച്.ആര്‍.സി അധ്യക്ഷ സ്ഥാനത്തേക്ക് ജസ്റ്റിസ് റോഹിങ്ടണ്‍ ഫാലി നരിമാന്‍, ജസ്റ്റിസ് കുറ്റിയില്‍ മാത്യു ജോസഫ് എന്നിവരുടെ പേരുകളായിരുന്നു കോണ്‍ഗ്രസ് നിര്‍ദേശിച്ചത്. അധ്യക്ഷനെ നിയമിക്കുമ്പോള്‍ പ്രദേശം, മതം, ജാതി എന്നിവയുടെ സന്തുലിതാവസ്ഥ പാലിച്ചില്ലെന്ന് കോണ്‍ഗ്രസ് നേതാക്കള്‍ വിയോജനക്കുറിപ്പില്‍ പറഞ്ഞു.
സുപ്രീംകോടതി മുന്‍ ചീഫ് ജസ്റ്റിസ് അരുണ്‍ മിശ്ര ജൂണ്‍ ഒന്നിന് സ്ഥാനമൊഴിഞ്ഞശേഷം അധ്യക്ഷസ്ഥാനം ഒഴിഞ്ഞുകിടക്കുകയായിരുന്നു. ആ സ്ഥാനത്തേക്കാണ് കേന്ദ്രസര്‍ക്കാര്‍ ഇപ്പോള്‍ വി. രാമസുബ്രഹ്‌മണ്യനെ നിയമിച്ചത്.
