തിരുവനന്തപുരം: എസ്പി സുജിത് ദാസിനെതിരെയുള്ള സ്വര്ണ്ണക്കടത്ത് ആരോപണത്തില് കസ്റ്റംസ് ഇന്റലിജന്സ് വിഭാഗം പ്രാഥമിക അന്വേഷണം ആരംഭിച്ചു. സുജിത് ദാസ് സ്വര്ണ്ണക്കടത്ത് സംഘത്തിന് സഹായം നല്കിയിട്ടുണ്ടോ എന്നാണ് പരിശോധിക്കുന്നത്. സുജിത് ദാസ് കസ്റ്റംസില് ഉണ്ടായിരുന്ന കാലയളവില് കള്ളക്കടത്ത് സംഘത്തിന് ഏതുതരം സഹായം ചെയ്തു, ആ കാലയളവില് കസ്റ്റംസിലുണ്ടായിരുന്ന ഉദ്യോഗസ്ഥര് ആരെല്ലാം തുടങ്ങിയ കാര്യങ്ങളാണ് കസ്റ്റംസ് വിഭാഗം അന്വേഷിക്കുക.
എസ്പി സുജിത് ദാസിന് കസ്റ്റംസിലുള്ള ബന്ധമാണ് കോഴിക്കോട്ട് വിമാനത്താവളത്തില് സ്വര്ണം കടത്താന് ഉപയോഗിക്കുന്നതെന്നായിരുന്നു പി വി അന്വര് എംഎല്എയുടെ ആരോപണം. സുജിത് ദാസ് മുന്പ് കസ്റ്റംസില് ഉദ്യോഗസ്ഥനായിരുന്നു. ദുബായില് നിന്ന് വരുന്ന സ്വര്ണം വരുമ്പോള് സുജിത് ദാസിന് വിവരം കിട്ടും. കസ്റ്റംസ് ഉദ്യോഗസ്ഥര് സ്കാനിങ്ങില് സ്വര്ണം കണ്ടെത്തിയാലും കണ്ടതായി നടിക്കില്ല. പകരം ഇവര് പുറത്തിറങ്ങുമ്പോള് പൊലീസിന് വിവരം കൈമാറും. പൊലീസ് ഇവരെ പിന്തുടര്ന്ന് പിടികൂടും. എന്നിട്ട് 50, 60 ശതമാനം സ്വര്ണം ഇവര് കൈക്കലാക്കും. ഇതാണ് രീതിയെന്നും പി വി അന്വര് ആരോപിച്ചിരുന്നു.
