തലശ്ശേരി: എഡിഎം നവീന് ബാബുവിന്റെ യാത്രയയപ്പ് പരിപാടിയില് താന് ക്ഷണിക്കാതെ കയറിച്ചെന്നതാണെന്ന വാദം തളളി പി.പി ദിവ്യ. കണ്ണൂര് കളക്ടര് മറ്റൊരു പരിപാടിയില് വെച്ചാണ് യോഗ വിവരം പറഞ്ഞതെന്നും തന്നെ പരിപാടിയിലേക്ക് ക്ഷണിച്ചതെന്നും ദിവ്യ പറഞ്ഞു. സംഭവത്തില് പ്രതി ചേര്ത്തതിന് പിന്നാലെ മുന്കൂര് ജാമ്യത്തിന് തലശ്ശേരി പ്രിന്സിപ്പല് സെഷന്സ് കോടതിയില് പി.പി ദിവ്യ അപേക്ഷ നല്കിയിട്ടുണ്ട്.തന്റെ പ്രസംഗം സദുദ്ദേശപരമായിരുന്നുവെന്നും ജാമ്യ ഹര്ജിയിലുണ്ട്.
നവീന് ബാബുവിനെതിരെ കൂടുതല് ആരോപണങ്ങളാണ് ഹര്ജിയില് ദിവ്യ ഉന്നയിക്കുന്നത്. ഫയലുകള് വെച്ചു താമസിപ്പിക്കുന്നു എന്ന് പരാതി നേരത്തെയും നവീനെതിരെയുണ്ട്. പ്രശാന്തന് മാത്രമല്ല, ഗംഗാധരന് എന്നയാളും തന്നോട് പരാതി പറഞ്ഞിട്ടുണ്ടെന്ന് ദിവ്യ ജാമ്യാപേക്ഷയില് വെളിപ്പെടുത്തുന്നു. ഫയല് നീക്കം വേഗത്തില് വേണമെന്ന് ചൂണ്ടിക്കാട്ടുകയാണ് ചെയ്തത്.
മുന്കൂട്ടി സംസാരിക്കാന് ഉദ്ദേശിച്ചിരുന്നില്ല. ഡെപ്യൂട്ടി കളക്ടര് ശ്രുതി ക്ഷണിച്ചപ്രകാരം ആണ് സംസാരിച്ചത്. ഉത്തരവാദിത്തപ്പെട്ട വ്യക്തികള് ഇരിക്കുന്ന പരിപാടി എന്ന നിലയിലാണ് അഴിമതിക്കാര്യം സംസാരിച്ചതെന്നും ദിവ്യ പറഞ്ഞു.
