കോട്ടയം: ചാനല് ചര്ച്ചയിലെ വിദ്വേഷ പരാമര്ശവുമായി ബന്ധപ്പെട്ട് പി സി ജോര്ജിനെതിരെ കേസെടുത്തു. ഈരാറ്റുപേട്ട പൊലീസാണ് കേസെടുത്തത്. മതസ്പര്ധ വളര്ത്തല്, കലാപാഹ്വാനം തുടങ്ങിയ വകുപ്പുകളാണ് പി സി ജോര്ജിനെതിരെ ചുമത്തിയിരിക്കുന്നത്.
കേസെടുത്തതിന് പിന്നാലെ പി.സി ജോര്ജിനെ അറസ്റ്റ് ചെയ്യാനും സാധ്യതയുണ്ട്. മുഖ്യമന്ത്രിയുടെ ഓഫീസിന്റെ അന്തിമ അനുമതിക്ക് ശേഷമാകും നടപടി.
മുസ്ലിംകള് മുഴുവന് വര്ഗീയവാദികളാണെന്ന പരാമര്ശത്തില് ഇന്നലെയാണ് ഈരാറ്റുപേട്ട പൊലീസ് ജോര്ജിനെതിരെ ജാമ്യമില്ലാ വകുപ്പുകള് ചേര്ത്ത് കേസെടുത്തത്.
ചാനല് ചര്ച്ചയിലെ വിദ്വേഷ പരാമര്ശത്തില് യൂത്ത് ലീഗ് നല്കിയ പരാതിയിലാണ് കേസെടുത്തത്. ജനുവരി ആറിന് ‘ജനം ടിവി’യില് നടന്ന ചര്ച്ചയിലായിരുന്നു പിസി ജോര്ജിന്റെ വിദ്വേഷ പരാമര്ശം.
