കൊച്ചി: എറണാകുളം പറവൂരില്‍ മുഖ്യമന്ത്രിക്കെതിരെ കരിങ്കൊടി വീശി പ്രതിഷേധിച്ചതില്‍ കോണ്‍ഗ്രസ് പ്രവര്‍ത്തകര്‍ക്കെതിരെ രജിസ്റ്റര്‍ ചെയ്ത കേസ് റദ്ദാക്കി ഹൈകോടതി. കരിങ്കൊടി പ്രതിഷേധം അപമാനകരമല്ലെന്നും കരിങ്കൊടി ഉപയോഗിച്ച പ്രതിഷേധം അപകീര്‍ത്തികരമോ അപമാനിക്കലോ അല്ലെന്നും ഹൈകോടതി വ്യക്തമാക്കി.
കേസ് റദ്ദാക്കിക്കൊണ്ടുള്ള ഉത്തരവിലാണ് കരിങ്കൊടിയില്‍ അപമാനിക്കാന്‍ ഒന്നുമില്ലെന്ന് കോടതി വ്യക്തമാക്കിയത്. ഏത് നിറത്തിലുള്ള കൊടി ഉപയോഗിച്ചുള്ള പ്രതിഷേധവും നിയമ വിരുദ്ധമല്ലെന്നും കോടതി പറഞ്ഞു.
2017ല്‍ പറവൂരില്‍ വെച്ച് മുഖ്യമന്ത്രിക്കെതിരെ കരിങ്കൊടി വീശിയതിനെതിരായ കേസാണ് കോടതി റദ്ദാക്കിയത്. ഉദ്യോഗസ്ഥരുടെ ജോലി തടസപ്പെടുത്തിയെന്ന കുറ്റവും കോടതി റദ്ദാക്കിയിട്ടുണ്ട്.
