ഡല്ഹി: മുന് പ്രധാനമന്ത്രി മന്മോഹന് സിംഗിന്റെ സംസ്കാരം നാളെ നടക്കും. അദ്ദേഹത്തിന്റെ മകള് അമേരിക്കയില് നിന്ന് എത്തിയതിനു ശേഷമായിരിക്കും സംസ്കാരം. ഭൗതികശരീരം ഡല്ഹി ജന്പതിലെ വസതിയില് എത്തിച്ചു. ഡല്ഹിയില് കോണ്ഗ്രസ് ആസ്ഥാനത്തും പൊതുദര്ശനം ഉണ്ടാകും.
പൂര്ണ ഔദ്യോഗിക ബഹുമതികളോടെയായിരിക്കും സംസ്കാരം നടത്തുക. മന്മോഹന് സിംഗിന്റെ നിര്യാണത്തെ തുടര്ന്ന് രാജ്യത്ത് ഏഴ് ദിവസത്തെ ദുഃഖാചരണവും പ്രഖ്യാപിച്ചിട്ടുണ്ട്. ഇന്ന് തീരുമാനിച്ച എല്ലാ സര്ക്കാര് പരിപാടികളും റദ്ദാക്കിയിട്ടുണ്ട്. കോണ്ഗ്രസിന്റെ അടുത്ത ഏഴ് ദിവസത്തെ എല്ലാ പരിപാടികളും റദ്ദാക്കിയതായി എഐസിസി ജനറല് സെക്രട്ടറി കെ സി വേണുഗോപാല് അറിയിച്ചു. 2025 ജനുവരി മൂന്നിന് ആയിരിക്കും പുനരാരംഭിക്കുക.
