തൃശ്ശൂര്: മലയാളത്തിന്റെ ഭാവഗായകന് പി. ജയചന്ദ്രന് (81) അന്തരിച്ചു. അഞ്ച് പതിറ്റാണ്ടിനിടെ പതിനാറായിരത്തോളം ലളിതസുന്ദര ഗാനങ്ങള് പാടിത്തീര്ത്താണ് അദ്ദേഹം വിടപറഞ്ഞത്.
തൃശ്ശൂരിലെ സ്വകാര്യ ആശുപത്രിയില് വ്യാഴാഴ്ച രാത്രി 7.45-ഓടെയായിരുന്നു അന്ത്യം. അര്ബുദരോഗബാധിതനായി ഏറെനാളായി ചികിത്സയിലായിരുന്നു. വ്യാഴാഴ്ച വൈകിട്ട് വീട്ടില്വെച്ച് ശാരീരിക അസ്വസ്ഥത അനുഭവപ്പെട്ടതിനെ തുടര്ന്ന് ആശുപത്രിയിലെത്തിക്കുകയായിരുന്നു.
സംസ്കാരം വെള്ളിയാഴ്ച വൈകിട്ട് തൃശ്ശൂര് ചേന്ദമംഗലം പാലിയത്ത് വീട്ടില്. രാവിലെ എട്ട് മണിക്ക് മൃതദേഹം തൃശ്ശൂര് പൂങ്കുന്നത്ത് വീട്ടില് എത്തിക്കും. പത്ത് മുതല് 12 മണിവരെ തൃശ്ശൂര് സംഗീത നാടക അക്കാദമിയില് പൊതുദര്ശനം നടക്കും.
1944 മാര്ച്ച് മൂന്നിന് എറണാകുളം ജില്ലയിലെ രവിപുരത്ത് രവി വര്മ്മ കൊച്ചനിയന് തമ്പുരാന്റെയും പാലിയത്ത് സുഭദ്രക്കുഞ്ഞമ്മയുടേയും അഞ്ച് മക്കളില് മൂന്നാമനായാണ് ജനനം.
മികച്ച ഗായകനുള്ള ദേശീയ, സംസ്ഥാന അവാര്ഡുകള് നേടിയിട്ടുള്ള ഒരു മലയാളി പിന്നണിഗായകനാണ് ജയചന്ദ്രന്. മലയാളം, തമിഴ്, കന്നഡ, തെലുഗു, ഹിന്ദി എന്നീ ഭാഷകളില് അദ്ദേഹം ഗാനങ്ങള് ആലപിച്ചിട്ടുണ്ട്. ഭാവഗായകന് എന്ന പേരില് അറിയപ്പെടുന്നു. കുഞ്ഞാലി മരയ്ക്കാര് എന്ന ചിത്രത്തിനു വേണ്ടിയാണ് ആദ്യം പാടിയതെങ്കിലും, ആദ്യം പുറത്തു വന്നത് കളിത്തോഴന് എന്ന ചിത്രത്തിനു വേണ്ടി പാടിയ-എക്കാലവും മലയാളികള് മലയാളികള് ഇഷ്ടപ്പെടുന്ന – മഞ്ഞലയില് മുങ്ങിത്തോര്ത്തി; ധനു മാസ ചന്ദ്രിക വന്നു എന്നു തുടങ്ങുന്ന ഗാനമാണ്.
1986-ല് ശ്രീനാരായണ ഗുരു എന്ന ചിത്രത്തിലെ ശിവശങ്കര സര്വ ശരണ്യവിഭോ എന്ന ഗാനത്തിലൂടെ ജയചന്ദ്രനെത്തേടി മികച്ച ഗായകനുള്ള ദേശീയ പുരസ്കാരമെത്തി. അഞ്ചുതവണയാണ് ജയചന്ദ്രന് മികച്ച ഗായകനുള്ള സംസ്ഥാനപുരസ്കാരം സ്വന്തമാക്കിയത്. 1972-ല് പണിതീരാത്ത വീട് എന്ന സിനിമയിലെ നീലഗിരിയുടെ സഖികളേ, 1978-ല് ബന്ധനത്തിലെ രാഗം ശ്രീരാഗം, 2000-ല് നിറത്തിലെ പ്രായം നമ്മില് മോഹം നല്കി, 2004-ല് തിളക്കത്തിലെ നീയൊരു പുഴയായ്, 2015-ല് ജിലേബിയിലെ ഞാനൊരു മലയാളി.., എന്നും എപ്പോഴുമിലെ മലര്വാകക്കൊമ്പത്തെ, എന്ന് നിന്റെ മൊയ്തീനിലെ ശാരദാംബരം എന്നീ ഗാനങ്ങളായിരുന്നു അവ. 1994-ല് കിഴക്ക് സീമയിലേ എന്ന ചിത്രത്തിലെ കട്ടാഴം കാട്ടുവഴി എന്ന ഗാനത്തിലൂടെ മികച്ച ഗായകനുള്ള തമിഴ്നാട് സര്ക്കാരിന്റെ പുരസ്കാരവും ജയചന്ദ്രന് സ്വന്തമാക്കി. തമിഴ് ചലച്ചിത്ര സംഗീതത്തിന് നല്കിയ സംഭാവനകള്ക്കുള്ള അംഗീകാരമെന്ന നിലയില് 1997-ല് തമിഴ്നാട് സര്ക്കാരിന്റെ കലൈമാമണി അവാര്ഡിനും അദ്ദേഹം അര്ഹനായി. 2021-ല് കേരളം അദ്ദേഹത്തെ ജെ.സി.ഡാനിയല് പുരസ്കാരം നല്കി ആദരിച്ചു.
സംഗീതത്തിന് പുറമെ സിനിമാ അഭിനയത്തിലും ജയചന്ദ്രന്റെ തന്റെ സാന്നിധ്യം അറിയിച്ചിട്ടുണ്ട്. ഹരിഹരന്റെ നഖക്ഷതങ്ങള്, ഓ.രാമദാസിന്റെ കൃഷ്ണപ്പരുന്ത് വി.കെ പ്രകാശ് സംവിധാനം ചെയ്ത ട്രിവാന്ഡ്രം ലോഡ്ജ് എന്നീ സിനിമകളിലും സംഗീത ആല്ബങ്ങളിലും പി.ജയചന്ദ്രന് അഭിനയിച്ചിട്ടുണ്ട്. ഭാര്യ: ലളിത. മക്കളായ ലക്ഷ്മിയും ദിനനാഥും ഗായകരാണ്.
