തിരുവനന്തപുരം: 63-ാമത് സംസ്ഥാന സ്കൂള് കലോത്സവത്തിന് ഇന്ന് തിരിതെളിയും. പ്രധാന വേദിയായ സെന്ട്രല് സ്റ്റേഡിയത്തില് മുഖ്യമന്ത്രി പിണറായി വിജയന് കലാമേള ഉദ്ഘാടനം ചെയ്യും. 44 വിദ്യാര്ത്ഥികള് പങ്കെടുക്കുന്ന നൃത്തശില്പത്തോടെയാണ് ചടങ്ങുകള് തുടങ്ങുക. ഹൈസ്കൂള് വിഭാഗം മോഹിനിയാട്ടത്തോടെ വേദികളുണരും.11 മണിയോടെ എല്ലാ വേദികളിലും മത്സരം ആരംഭിക്കും.
ഉരുള്പൊട്ടലില് തകര്ന്ന വയനാട് വെള്ളാര്മല സ്കൂളിലെ വിദ്യാര്ത്ഥികളുടെ നൃത്തവും ഉദ്ഘാടന ചടങ്ങില് അരങ്ങേറും. 25 വേദികളിലായി നടക്കുന്ന 249 മത്സരയിനങ്ങളില് പങ്കെടുക്കുന്നത്, പതിനയ്യായിരത്തിലേറെ വിദ്യാര്ത്ഥികളാണ്. ഹയര് സെക്കണ്ടറി വിഭാഗം പെണ്കുട്ടികളുടെ സംഘനൃത്തവും, ഒപ്പനയും, ഹൈസ്കൂള് വിഭാഗം പെണ്കുട്ടികളുടെ മാര്ഗംകളിയും ആദ്യദിനം തന്നെ വേദിയിലെത്തും.
