കണ്ണൂര്‍: ശ്രീകണ്ഠപുരം വളക്കൈയില്‍ ഒരുകുട്ടിയുടെ മരണത്തിനിടയാക്കിയ സ്‌കൂള്‍ ബസ് അപകടത്തിന് കാരണം ബസിന്റെ ബ്രേക്ക് നഷ്ടപ്പെട്ടതല്ലെന്ന് കണ്ടെത്തല്‍. അപകടത്തിന് കാരണമാകുന്ന മറ്റ് മെക്കാനിക്കല്‍ തകരാറുകള്‍ വാഹനത്തിന് ഇല്ലെന്നും മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്റ് വിഭാഗം പ്രാഥമിക റിപ്പോര്‍ട്ട് ആര്‍.ടി.ഒക്ക് നല്‍കി.
ബസിന്റെ ബ്രേക്ക് പൊട്ടിയതിനെ തുടര്‍ന്ന് നിയന്ത്രണം നഷ്ടമായി എന്നായിരുന്നു ഡ്രൈവറുടെ മൊഴി. ഡ്രൈവറുടെ വാദം മോട്ടോര്‍ വാഹന വകുപ്പ് തള്ളി. ബസ്സില്‍ നടത്തിയ പരിശോധനയില്‍ തകരാറില്ലെന്ന് കണ്ടെത്തി.
അമിത വേഗവും ഡ്രൈവറുടെ പരിചയക്കുറവും അപകടകാരണമായെന്നാണ് പ്രാഥമിക നിഗമനം. ഇയാള്‍ക്കെതിരെ ശ്രീകണ്ഠപുരം പൊലീസ് കേസെടുത്തു. ലൈസന്‍സ് സസ്‌പെന്‍ഡ് ചെയ്യാനുള്ള നീക്കവും നടക്കുന്നുണ്ട്. അപകടസമയത്ത് ഡ്രൈവര്‍ നിസാം മൊബൈല്‍ ഉപയോഗിച്ചതായും സൂചനയുണ്ട്. അപകടം നടന്ന അതേസമയത്ത് തന്നെ വാട്‌സാപ്പില്‍ സ്റ്റാറ്റസ് പ്രത്യക്ഷപ്പെട്ടിരുന്നു.
ഇന്നലെ വൈകിട്ട് നാലരയോടെയാണ് വളക്കൈയില്‍ വെച്ച് ബസ് മറിഞ്ഞത്.അപകടത്തില്‍ മരിച്ച കുറുമാത്തൂര്‍ ചിന്മയ സ്‌കൂള്‍ അഞ്ചാംതരം വിദ്യാര്‍ഥിനി ചെര്‍ക്കള നാഗം സ്വദേശിനി വായക്കല്‍ വീട്ടില്‍ നേദ്യ എസ്. രജേഷിന്റെ(11) മൃതദേഹം പരിയാരം മെഡിക്കല്‍ കോളജിലെ പോസ്റ്റ്‌മോര്‍ട്ടത്തിനു ശേഷം ഇന്ന് ബന്ധുക്കള്‍ക്ക് വിട്ടുനല്‍കും. പരിക്കേറ്റ വിദ്യാര്‍ഥികള്‍ ചികിത്സയില്‍ തുടരുകയാണ്. ആരുടെയും നില ഗുരുതരമല്ല.
