തിരുവനന്തപുരം: പിവി അന്വര് എംഎല്എയുടെ ആരോപണങ്ങള്ക്ക് പിന്നാലെ മുഖ്യമന്ത്രി രാജിവെക്കണമെന്ന് ആവശ്യപ്പെട്ട് യൂത്ത് കോണ്ഗ്രസ് പ്രവര്ത്തകര് സെക്രട്ടറിയേറ്റിലേക്ക് നടത്തിയ മാര്ച്ചില് സംഘര്ഷം. ബാരിക്കേടുകള് മറികടക്കാന് ശ്രമിച്ചതോടെ പ്രവര്ത്തകര്ക്ക് നേരെ പോലീസ് ലാത്തി വീശുകയും ജലപീരങ്കി പ്രയോഗിക്കുകയും ചെയ്തു. മുഖ്യമന്ത്രി രാജിവെക്കണം, ആരോപണങ്ങള് നേരിടുന്ന ഉദ്യോഗസ്ഥര്ക്കെതിരെ വിശദമായ അന്വേഷണം നടത്തണം തുടങ്ങിയ ആവശ്യങ്ങള് ഉന്നയിച്ചാണ് യൂത്ത് കോണ്ഗ്രസിന്റെ മാര്ച്ച്.
യൂത്ത് കോണ്ഗ്രസ് സംസ്ഥാന പ്രസിഡന്റ് രാഹുല് മാങ്കൂട്ടത്തില്, വൈസ് പ്രസിഡന്റ് അബിന് വര്ക്കി എന്നിവരുടെ നേതൃത്വത്തിലായിരുന്നു മാര്ച്ച് നടത്തിയത്. അബിന് വര്ക്കി അടക്കമുള്ള നേതാക്കള്ക്ക് ലാത്തി ചാര്ജില് പരിക്കേറ്റു.പ്രദേശത്തെ ഗതാഗതം പൂര്ണമായും തടസ്സപ്പെട്ട സാഹചര്യമാണ് നിലവിലുള്ളത്. പോലീസ് പ്രവര്ത്തകരെ അറസ്റ്റ് ചെയ്തുനീക്കാനുള്ള ശ്രമത്തിലാണ്.
